Bumili batay sa kakayahan at kagustuhan.
Tugon ito ni DTI o Department of Trade and Industry Undersecretary Teodoro Pascua sa gitna na rin ng mga report na may mga canned goods partikular ng mga sardinas ang tataas ang presyo.
Sinabi sa DWIZ ni Pascua na mayroong 14 na brand ng sardinas na maaaring pagpilian ng publiko depende na rin sa kanilang kakayahang bumili o kung anong brand ang gusto nila.
“Yung mga sardinas ay merong naka-under SRP, yung iba ay hindi, siguro sa ating merkado mas marami pa sa 14 na sardinas na brand ang nag-exist, kaya ang lagi naming ikinakampanya sa mga mamimili ay dapat maging mapagmasid at matalino, marami pang brand ang puwedeng piliin at marami pa ang puwedeng i-substitute depende sa kakayahan nila, yung iba kagustuhan, yung iba kakayahan.” Pahayag ni Pascua
Sinabi rin ni Pascua na walang pagtaas sa main ingredients ng noche buena items ngayong papalapit na ang Pasko, aniya ang may abiso lang sa kanila na magtataas ng presyo ay dalawang brand ng ham.
Samantala, tiniyak naman ni Pascua na hindi lahat ng flour manufacturers sa bansa ay magtataas ng presyo ng harina na pangunahing sangkap sa paggawa ng tinapay.
Ipinabatid ni Pascua na sa 11 manufacturers ng harina sa bansa ay tatlo lamang dito ang nagtaas ng presyo.
(AR/ Balitang Todong Lakas)