Naniniwala ang beteranong election lawyer na si Romulo Macalintal na mababaliwala lamang ang ihahaing election protest ni Senador Bongbong Marcos laban kay Vice President-elect Leni Robredo.
Ito, ayon kay Macalintal, ay sa oras na tanggapin ni Marcos ang alok ni incoming President Rodrigo Duterte na maging bahagi ng kanyang gabinete matapos ang one-year ban ng appointments ng mga natalong kandidato.
Isa anyang senyales na tinatanggap na ng Senador ang pagkatalo nito sa Vice Presidential race kung tatanggapin ang alok ni Durerte.
Ipinaliwanag ni Macalintal na sa halip ikunsidera ang cabinet position sa ilalim ng susunod na administrasyon ay dapat ituon ng Senador ang kanyang atensyon sa election protest.
Maituturing din anyang “political suicide” para kay Marcos ang pagtanggap ng cabinet position habang nakabinbin ang kanyang election protest dahil hihina ang tsansa na manalo siya sa kaso.
By: Drew Nacino