Ipinangako ng Philippine National Police na titiyakin nilang hindi matutulad sa isyu ng ilegal na POGO operation ang sinasabing ilegal na bentahan ng sigarilyo sa bansa.
Ayon kay PNP Chief General Jose Melencio Nartatez Jr., ang nasabing isyu ang dahilan kung bakit agresibo ang pulisya sa pagsasagawa ng mga raid para makumpiska ang maraming ilegal na sigarilyo at ipasara ang mga pabrika ng mga ilegal na produkto.
Tiniyak ni General Nartatez sa publiko na mas paiigtingin pa nila ang mga ikinakasang operasyon upang hindi ito maging bagong suliranin sa bansa tulad ng POGO.
Binigyang-diin ng hepe ng pulisya na magpapatuloy ang mga pagsalakay laban sa mga hindi otorisadong pabrika habang palalakasin din ng pulisya ang koordinasyon sa iba pang kinauukulang ahensya upang buwagin ang mga ilegal na kalakalan ng sigarilyo.
