Tanging mga iligal na armas na pagmamay-ari umano ng mga Parojinog ang siyang target ng isinagawang raid ng pulisya sa tahanan ng mga ito sa Ozamiz City, Misamis Occidental.
Ito ang nilinaw sa DWIZ ni PNP o Philippine National Police Region 10 Director P/Supt. Lemuel Gonda kasunod ng pagsisilbi ng search warrant ng mga tauhan ng CIDG o Criminal Investigation and Detection Group Region 10 gayundin ng Ozamiz City PNP.
Ayon kay Gonda, nakabatay sa intelligence reports ang oras kung kailan isisilbi ng kanilang mga tauhan ang search warrant na inilabas ng Quezon City Regional Trial Court sa kahilingan naman ng CIDG mula sa Kampo Crame.
“Yung naka-indicate sa lahat ng search warrant laban sa mga Parojinog, yung 6 na search warrant ay yung sa firearms and ammunition, so pag-conduct ng search nakita po doon ang iligal na droga, ang warrant naman wala namang ano kung anong oras ise-serve, depende yan sa operating troops at intelligence reports na natanggap natin kung anong best time na less vulnerable sa mga pulis na magiging casualty.” Ani Gonda
Giit pa ni Gonda, sinunod nila ang mga proseso sa paghahain ng search warrant alinsunod sa batas, ngunit bukas sila sa anumang imbestigasyon kung kakailanganin.
“Simultaneous po, sa lahat ng area ginawa ang search, sabay-sabay po, so sa bahay lang ni Mayor Parojinog nagkaroon ng bakbakan kasi pinaputukan ang kapulisan, syempre nag-retaliate ang Kapulisan natin, in fact may isa tayong wounded na pulis, pero okay na siya ngayon.” Pahayag ni Gonda
By Jaymark Dagala | Ratsada Balita Interview
