Kumikilos na rin ang PNP Anti-Kidnapping Group (AKG) para maresolba ang kaso ng pagdukot sa isang babaeng Chinese national sa Makati City kagabi.
Ayon kay PNP-AKG Spokesperson Police Lt. Col. Joel Saliba, bumuo na sila ng isang grupo na makikipagtulungan sa mga operatiba ng Makati City Police Office upang matuntunon ang kinaroroonan ng biktima.
Gayunman sinabi ni Saliba na wala pa silang natatanggap na pormal na reklamo mula sa pamilya ng biktima.
Samantala, tinitignan namang motibo ng Makati City Police ang pagkakautang ng biktima dahil sa online gaming o pagnanakaw.
Magugunitang nag-viral sa social media ang video ng pagdukot sa dayuhang biktima sa Paseo De Roxas kung saan, makikitang sapilitan itong isinakay sa kulay gray na van habang nagsisigaw. — ulat mula kay Jaymark Dagala (Patrol 9)
