Tagos sa puso.
Ito ang naging reaksyon ni dating Pangulong Noynoy Aquino nang matanong kaugnay ng mensahe ni Pangulong Rodrigo Duterte sa ika – 34 na anibersaryo ng pagkamatay ng amang si dating Senador Ninoy Aquino.
Ayon kay Aquino, maiging basahin ni Pangulong Duterte ang nasabing mensahe paminsan – minsan.
Payo pa ng dating Pangulo na kunwari ay iwan ito ni Pangulong Duterte sa kanyang mesa para muling mabasa dahil maganda aniya ang nilalaman ng mensahe at kailangan nitong tandaan.
Magugunitang, ikinagalit ni Pangulong Duterte ang naging pahayag noon ni dating Pangulong Aquino sa ‘war on drugs’ ng administrasyon dahil wala pa umano itong nakakamit na magandang resulta.
Paggunita ng pamilya Aquino
Sama-samang ginunita ng pamilya Aquino ang ika-34 na anibersaryo ng kamatayan ni dating Senador Noynoy Aquino.
Sa pamamagitan ito ng isang misa sa mismong puntod ng yumaong senador sa Manila Memorial Park.
Bukod sa mga miyembro ng pamilya Aquino, dumalo rin sa misa si Vice President Leni Robredo.
