Binanatan ni Pangulong Benigno Aquino III si Senador Bongbong Marcos.
Ito ay kasabay ng ika-30 anibersaryo ng EDSA People Power Revolution.
Ayon sa Pangulo, bigo si Marcos na aminin man lamang sa publiko na may mali sa Martial Law na idineklara ng ama nitong si dating Pangulong Ferdinand Marcos habang may lakas ito ng loob na mag-ambisyong muling pamunuan ang bansa.
“Papaanong nagpapakatotoo ka sa pagpapakitang handa kang tularan ang iyong ama? Linawin ko din po hindi ito usapin ng Aquino laban sa Marcos, malinaw na malinaw sa akin na laban ito ng tama at mali, sa paglabas ko nga po makailang ulit na po akong natatanong ng mga dayuhan, Is it true that the Marcoses are still in power? talagang napakahirap na ipaliwanag, hanggang ngayon ay napakasakit isipin na isang Pilipino ay nasikmurang apihin ang kapwa Pilipino gaya ng ginawa ni Ginoong Marcos.” Ani Aquino.
Hindi rin naitago ng Pangulo ang panghihinayang sa hindi naipasang Bangsamoro Basic Law (BBL) na dahil aniya sa pagharang dito ni Senador Marcos at Senador Juan Ponce Enrile na sila aniyang mukha ng militarisasyon noong panahon ng Martial Law.
“Dahil ang tanging batas na maghahatid ng katarungan at kapayapaan sadya pa pong hinarang, ang BBL naipit sa senado sa committee para sa lokal na gobyerno na pinangungunahan ni Senador Marcos, nung pinakahuling araw ng sesyon, tuloy pa rin ang pag-interpellate ni Senador Enrile, di po ba itong dalawang apelyido ding ito ang nagtulak ng military solution para sa mga Moro noong panahon ng diktadurya?” Pahayag ni Aquino.
By Ralph Obina
