Aarangkada na ngayong araw ang unang serye ng “Pili”Pinas debate 2016 sa Cagayan de Oro City sa Mindanao.
Ito’y bilang bahagi ng pagkilatis ng mga botante sa kung sino ang karapat-dapat na maging susunod na pangulo ng Republika ng Pilipinas.
Gagawin ang nasabing debate sa mini theater ng Capitol University sa Cagayan de Oro na inorganisa ng pinagsanib na puwersa ng comelec at ng kapisanan ng mga Brodkaster ng Pilipinas o KBP.
Ang pahayagang Philippine Daily Inquirer at GMA Network ang siyang naatasang manguna sa pagsasahimpapawid at tumayong moderator para sa naturang debate.
Kasunod nito, ipinaliwanag ni COMELEC Spokesman James Jimenez sa detalye ng paghaharap-harap ng limang kandidato sa pagkapangulo.
Una rito ay ang paggamit ng modified two moderator debate, kung saan, bibigyan ng pagkakataon ang bawat kandidato para sa kanilang pambungad na pananalita.
Bahagi rin ng debati ani Jimenez ang pagbibigay oras sa mga kandidato na makapagtanong sa kapwa nila kandidato.
May inilatag din silang patakaran para sa mga kandidato sa gagawin nilang pagsagot sa mga paksang ilalatag sa kasagsagan ng debate
Magsisimula ang debate ganap na ala singko mamayang hapon hanggang alas 7:00 ng gabi na sabayang mapakikinggan sa lahat ng KBP member stations kabilang na ang DWIZ 882.
By: Jaymark Dagala
