Maraming pangalan, birthday, social security numbers at dalawang beses na nagpakasal sa Amerika.
Ito ang nakuhang mga impormasyon ng Newsweek sa Amerika kaugnay kay Marilou Danley, kasintahan umano ng gunman sa mass shooting na naganap sa Las Vegas.
Ayon pa sa Newsweek, si Marilou ay unang ikinasal noong 1990 kay Geary Danley at 1996 naman sa isang Jose Bustos at lumalabas sa divorce records sa Amerika na hindi napawalang bisa ang unang kasal nito bago ginawa ang ikalawang kasal.
Ang 76 na taong gulang na si Danley ay naninirahan ngayon sa Arkansas at may anak na babae na naka-base naman sa California.
Unang dumating sa Amerika si Marilou bilang Marilou Natividad at naging Marilou Danley matapos ang unang kasal
Sa California, si Marilou ay naka-rehistro bilang Marilou Natividad – Bustos at nakatala ang kaarawan nito na Enero 1962.
Subalit sa hiwalay na social security number sa Nevada, Marilou Danley naman ang pangalan niya na may birth date na Disyembre 1954.
Si Marilou ay mayroon ding multiple addresses sa Arkansas, Tennessee, California, Florida at iba pang estado sa Amerika, at madalas nagpapalipat-lipat sa mga lungsod sa mga naturang state.
