Iginiit ni Partido Demokratiko Pilipino Laban o PDP-Laban Deputy Spokesman Atty. Ferdinand Topacio na palabas lamang ang isinasagawang imbestigasyon ni Pangulong Ferdinand Marcos Jr. sa flood control projects.
Ayon kay Atty. Topacio, dapat ay honest to goodness at sincere ang naturang imbestigasyon, pero sa nakikita ng kanilang grupo, tila for show lamang ang ginagawang imbestigasyon ng Pangulo.
Binigyang-diin ng abogado na bukod sa contractors ng mga flood control project dapat unang silipin ni Pangulong Marcos ang Department of Public Works and Highways.
Matatandaang inilabas ng Pangulo ang top 15 contractors ng depektibong flood control projects, ngunit nang imbitahan si Sara Discaya na may-ari ng dalawang construction company na kabilang sa listahan, bigo itong sumipot.
Dagdag pa ng abogado, welcome naman ang mga imbestigasyon sa anumang anomalya ng pamahalaan dahil naniniwala ang PDP-Laban sa ‘good governance’ at ‘anti-corruption’.
