Hinamon ni Akbayan Partylist Rep. Perci Cendaña si Pangulong Ferdinand Marcos Junior na iprayoridad at sertipikahan bilang urgent ang panukalang dalawandaang pisong minimum wage hike.
Ayon kay Congressman Cendaña, ang umento sa sahod ang tunay na pamasko para sa mga manggagawa at hindi ang kathang-isip na limandaang pisong budget para sa noche buena.
Nabatid na nananatiling nakabinbin ang House Bill 766 o ang 200 pesos wage increase sa House Committee on Labor and Employment kung saan sina Representative Cendaña, Chel Diokno, Dadah Kiram Ismula, at Dinagat Island Rep. Kaka Bag-ao ang may akda nito.
Umaasa si Congressman Cendaña na pakikinggan ni Pangulong Ferdinand Marcos Junior ang hinaing ng taumbayan dahil kung seryoso ang administrasyon na makuha muli ang tiwala ng taumbayan, dapat nang madaliin ang pagpapataas sa kita ng mga manggagawa.
