Binatikos ni Pangulong Rodrigo Duterte ang mga nagdaang administrasyon dahil sa pinasok ng mga itong kontrata na may bahid ng kurapsyon.
Sa ginanap na miting de avance sa Davao City, iginiit ni Pangulong Duterte na hindi niya pahihintulutang maipatupad sa ilalim ng kanyang administrasyon ang mga kontratang may kwestyunableng probisyon.
Hindi naman sinabi ng punong ehekutibo kung sino sa mga nagdaang presidente ang kanyang pinatatamaan.
Pero, binanggit naman ng pangulo ang kontratang pinasok noon ng gobyerno sa Manila Gas na magtatagal hanggang sa taong 2077.
Ayon kay Pangulong Duterte, nakasaad sa kontrata, na ang pamahalaan ang magbabayad sa projected income o kita ng Manila Gas hanggang 2077 kapag nagkaroon ng di inaasahang pagkansela ng kasunduan.
Giit ng pangulo, malinaw na talo o naisahan ang taumbayan sa kontratang ito kayat mariin aniyang tututulan ang implementasyon nito.
