Kasama na si Senate President Vicente Sotto III sa pulong ni Vaccine Czar Secretary Carlito Galvez kagabi para pag-usapan ang isyu sa mga binibiling bakuna kontra COVID-19 ng pamahalaan.
Ayon kay Sotto si Sen. Panfilo Lacson ang nag-abiso sa kaniya para sumama sa naturang pagpupulong.
Bukod kay Lacson at Sotto kasama rin si Sen. Ronald Bato Dela Rosa.
Una rito sinabi ni Galvez na maipapaliwanag niya ng maayos ang detalye ng mga pinapasok na kasunduan sa supplier ng bakuna kung kina Lacson at Dela Rosa niya ito isisiwalat bilang mga kapwa tiga-PMA niya ang mga ito.
Magugunitang sinabi ni Sotto na ano man ang maging resulta ng kanilang pulong, tuloy pa rin ang nakatakdang panibagong public hearing ng committee of the whole sa Biyernes.
Layon umano nitong malinawan ang presyo ng bakuna at makatulong din sa pagpapataas ng kumpiyansa ng publiko sa COVID vaccine sa pamamagitan ng pagtiyak sa kaligtasan at bisa nito.