Umalma ang ilang online sellers sa pagpapatupad ng 1% withholding tax sa online shopping platforms.
Batay ang nabanggit na withholding tax requirement sa Revenue Regulations No. 16-2023 ng Bureau of Internal Revenue (BIR) na inilabas noong nakaraang buwan.
Paglilinaw ni BIR Commissioner Romeo Lumagui Jr., hindi ito bagong buwis kaya naman hindi dapat ito magresulta sa pagtaas ng bilihin. Aniya, isa lang itong “mode of collecting.”
Dagdag pa ng commissioner, isa sa mga layunin ng pagpataw ng 1% withholding tax ang mahiyakat ang mga negosyante na magparehistro sa BIR.
Pasok sa nasabing polisiya ang sellers o merchants ng online shopping apps, food delivery apps, online hotel booking sites, at transport services apps.
Hindi naman papatawan ng withholding tax ang mga maliliit na negosyo na may kita sa isang taon na mas mababa sa P500,000.