Mas naging madalas ang pagpapatrolya ng Chinese Coast Guard sa bahagi ng Scarborough Shoal at iba mga pinagtatalunang teritoryo sa South China Sea sa gitna ng COVID-19 pandemic.
Batay ito sa ipinalabas na ulat ng US based think tank na Asia Maritime Transparency Initiative –Center for Strategic and International Studies (AMTI-CSIS).
Anila, isa hanggang dalawang Chinese coast guard vessel ang dumaan sa Scarborough Shoal sa loob ng 287 araw sa nakalipas na 366 na araw o isang taon.
Kumpara anila ito sa 162 araw na naitala noong nakaraang taon.
Dagdag sa report, karaniwan ding nag-iikot sa Half-Moon Shoal ang barko ng China matapos ang pagpa patrolya sa Second Thomas Shoal.
Ang Half-Moon Shoal ay nasa 60 nautical miles lamang ang layo sa bahagi ng Palawan kung saan naaresto ang may 11 Chinese nationals dahil sa Poaching noong 2014.
Nakasaad din sa ulat na magkakapareho ang lebel ng presensiya ng Chinese coast guard sa bahagi ng Scarborough, Second Thomas, Luconia at Vanguard Shoal batay sa ipinakikitang datos ng automatic identification system (AIS).
Gayunman, hindi pa rin anila masasabing eksakto ang datos dahil marami pa rin anilang pagkakataon na pinapatay ng Chinese coast guard ang kanilang AIS signals.