Pinaiimbestigahan na sa Kamara ang paglipana ng e-cigarettes o vapes na may halong marijuana.
Kasunod ito sa ulat ng Philippine Drug Enforcement Agency na dumarami ang ganitong uri ng vape na kanilang nasasabat sa anti-illegal drug operations
Ayon kay Lanao Del Sur Representative Zia Alonto Adiong, posibleng samantalahin ng illegal drug traffickers ang naturang bagong teknik sa pagpupuslit ng iligal na droga lalo at maganda ang market ng vape kaya’t mahalagang magkasa ng pagdinig kaugnay dito
Naniniwala naman si Davao Oriental Representative Cheeno Almario na hindi isolated case ang naturang diskarte dahil sa ibang mga bansa ay legal ang paggamit ng medical marijuana at mismong kumpanya pa aniya ang nag-e-extract ng langis upang magamit sa vapes.
Giit naman ni AKO Bicol Party-List Representative Jil Bongalon na dapat matukoy ang mga teknolohiyang ginagamit sa paglaganap ng nasabing uri ng e-cigarettes kasabay ng paalala na iligal pa rin ang paggamit ng marijuana sa bansa – sa panunulat ni Jeraline Doinog, mula sa ulat ni Gilbert Perdez