Sisimulan na bukas, Nobyembre a-23 ang rollout ng pagbabakuna ng ikatlong dose o booster shots para sa mga nasa A2 at selected A3 priority group sa lungsod ng San Juan.
Ito ang kinumpirma ni San Juan City Mayor Francis Zamora makaraang matanggap na nila ang memo mula sa Department of Health.
Ang mga nasa A2 at A3 category ay mga senior citizen with comorbidities at mga uniformed personnel na itinuring ding frontliners kontra COVID-19.
Salig sa panuntunan ng DOH, maaari nang bigyan ng booster shots ng bakuna kontra COVID 19 ang mga fully vaccinated na ng nakalipas na 6 hanggang 8 buwan.
Sa kasalukuyan, mayroon na lamang 29 COVID-19 cases sa San Juan na siyang pinakamababa mula nang magsimula ang pandemiya nuong Marso ng nakalipas na taon.
Ayon kay Mayor Zamora, nasa 97% ang ibinagsak ng bilang ng mga naitatalang kaso sa lungsod mula nuong Setyembre a-16 ng taong ito na nasa 1,123.
