Nag-krus ang landas nina Senador Manny Pacquiao at Davao City Mayor at Presidential Daughter Inday Sara Duterte-Carpio sa gitna ng ugong na banggaan ng dalawa sa 2022 presidential election.
Mainit ang mata ni Pangulong Rodrigo Duterte kay Pacquiao dahil sa akusasyon nitong lumala ang korapsyon sa gobyerno.
Gayunman, tila hindi ito alintana ng Senador at Alkalde na kapwa dumalo sa 75th anniversary ng Diplomatic Relations ng Pilipinas at Estados Unidos sa US Embassy sa Maynila.
Aminado si Pacman na hindi siya nakisalamuha kay Mayor Inday pero nagpa-picture lang sila sa nasabing event habang hindi nagpa-unlak ng interview sa media ang alkalde.
Una nang itinanggi ni Pacman na binabatikos niya si Pangulong Duterte sa issue ng korapsyon bagay na ikina-irita ng Punong Ehekutibo.
Nito lamang Lunes ay hinamon ng nakatatandang Duterte ang kapartidong si Pdp-Laban President Pacquiao na pangalanan ang mga ahensya ng gobyerno na sangkot umano sa katiwalian, na tinanggap naman ni Pacman. —sa panulat ni Drew Nacino