Tinawag ni House Deputy Speaker Janette Garin na “medyo funny” ang hiling ng Office of the Vice President o OVP na ang Senado ang sumagot sa gastusin sa “catering” ng defense team, support staff, at mga testigo sa panahon ng impeachment trial.
Sa pulong-balitaan, sinabi ni DS Garin na bagama’t hindi pa niya nababasa ang liham, karapatan ng depensa na magkaroon ng catering.
Gayunman, kung ipasasagot ito sa Senado, aniya, ay “highly improper” dahil may sariling opisina at pondo ang Office of the Vice President na dapat sumagot sa naturang gastusin.
Dagdag pa ni Garin, hindi karaniwang nangyayari na ang isang hukuman ang gagastos para sa pagkain ng mga abogado at kanilang mga kasama.
Aniya, maaaring ma-misinterpret ito bilang kawalan ng paggalang sa impeachment court.
Kaugnay naman ng isyu ng security concern, sinabi ni Garin na isang insulto ang pagdududa na maaaring may lason ang pagkaing ihahain ng Senado.
Binigyang-diin niya na walang taong nasa tamang pag-iisip ang magpaplanong manakit o manlason sa mga taong papasok sa Senado. | via Geli Mendez (Patrol 30)
