Binatikos ni Akbayan Party-list Rep. Perci Cendaña ang hiling ng tanggapan ni Vice President Sara Duterte na sagutin ng Senado ang gastusin para sa “catering” ng defense team, support staff, at mga testigo sa panahon ng impeachment trial.
Ayon kay Cendaña, tila mas abala umano ang bise presidente sa usapin ng catering kaysa sa pagharap sa paglilitis.
Inihalintulad pa ito ni Cendaña sa isang bisitang nag-RSVP ng sampung tao ngunit demanding pa sa buffet.
Hirit tuloy ng mambabatas, “Bloodbath ba talaga ang gusto ng kampo ng bise presidente o birthday party?”
Nauna nang kinumpirma ni Senator-Judge Panfilo “Ping” Lacson na nakatanggap ng liham si Senate President Sherwin Gatchalian mula kay Vice President Duterte na humihiling na ang Senado ang sumagot sa mga expenses ng kanyang kampo, partikular ang pagkain at inumin, at kunin ito sa accredited caterer ng Office of the Vice President.
Aniya, tila mas “concerned” o nag-aalala pa umano ang bise presidente sa catering kaysa sa paglilitis sa kanya sa impeachment court.
Samantala, nilinaw ni Atty. Michael Poa, ang tagapagsalita ng bise presidente, na walang partisipasyon ang defense team sa naturang liham, kaya ang OVP na lamang ang dapat magpaliwanag sa usapin.
Dagdag pa ni Poa, maaaring nais lamang tiyakin ni VP Sara ang kapakanan ng kanyang defense team, at nilinaw ring hindi kasalukuyang sinusuplayan ng Senado ang kanilang pagkain at inumin. | via Geli Mendez (Patrol 30)
