Kinundena ni Senador Risa Hontiveros ang umano’y sunod-sunod na death threats at mga komento sa social media na umano’y naghihikayat ng karahasan kasunod ng pagkamatay ng vlogger na si Mima Alicia.
Ayon sa senador, sa halip na makiramay, may ilang netizens umanong nagdiwang pa sa nangyari at nag-udyok ng karahasan. Dagdag pa niya, marami rin ang hayagang nagbabantang siya na umano ang “susunod.”
Isinumite na aniya ng kanilang kampo sa National Bureau of Investigation (NBI) ang mga pangalan at screenshots ng daan-daang Facebook users na umano’y nagbanta sa kaniyang buhay.
Nanawagan din ang senador sa mga social media platform at law enforcement agencies na kumilos laban sa lumalalang kultura ng impunity sa online platforms.
Iginiit ni Hontiveros na hindi dapat maging normal ang pagbabanta sa buhay ng kapuwa, anuman ang pagkakaiba ng paniniwala sa pulitika.
“We cannot allow such hatred to cost another life. We are better than this,” dagdag pa ng senador.
