Magpapatupad na rin ng “no face mask, no entry” sa buong National Headquarters ng Philippine National Police (PNP) sa Kampo Crame.
Ito, ayon kay PNP Deputy Chief for Administration Lt/Gen. Camilo Cascolan, ay bahagi ng puspusang pagpapaigting ng seguridad ng Pulisya laban sa 2019 novel coronavirus (nCoV).
Ayon kay Cascolan, ang nasabing utos ay resulta ng naging pagpupulong nila ni PNP Chief P/Gen. Archie Gamboa nito lang Huwebes upang mapanatiling ligtas sa nasabing virus ang punong tanggapan ng Pambansang Pulisya.
‘No face mask, no entry’, Ipatutupad na rin sa mga Kampo ng Pulisya sa buong bansa | via @jaymarkdagala pic.twitter.com/gAKutMKfA7
— DWIZ Newscenter (@dwiz882) February 3, 2020
Kasunod nito, sinabi ni Cascolan na pinulong na niya ang Headquarters Support Service (HSS) upang ilatag na ang mahigpit na pagpapatupad ng nasabing polisiya.
Dahil dito, hindi papayagang makapasok sa Kampo Crame ang mga Police Personnel at sibilyang hindi nakasuot ng facemask subalit may libreng namamahagi naman nito sa entrada ng kampo at may libreng rubbing alcohol din.
Paglilinaw ni Cascolan, hindi lang sa Kampo Crame aniya epektibo ang nasabing kautusan dahil ibaba rin nila ito sa lahat ng kampo ng PNP hanggang sa mga himpilan nila sa buong bansa upang mailayo sa peligro ang kanilang mga tauhan.
