Nakumpirma sa nagpapatuloy na impeachment trial na may mga kaugnayan sa administrasyon ni dating Pangulong Rodrigo Duterte ang negosyanteng si Jaime Cruz, na lumilitaw sa corporate records na may kaugnayan kay Vice President Sara Duterte.
Sa redirect examination ni private prosecution Erwin Matib, kinumpirma ni SEC Company Registration and Monitoring Department Director Gerardo Del Rosario ang pangalan ni Cruz sa records ng ilang kumpanya, kabilang ang Metro City Chow Foods, kung saan kapwa orihinal na subscriber sina Cruz at Duterte.
Si Cruz din ang kinatawan ng JTC Group of Companies sa Gencorp Industries, na may 55-percent na corporate subscription.
Kinumpirma naman ng prosecution na ang Jaime Cruz sa mga corporate records ay siya ring itinalaga ni dating Pangulong Duterte bilang special envoy sa China noong 2019 at inalok din ito ng posisyon bilang PhilHealth President at CEO, pero tinanggihan niya ito.
Ang ginawang redirect examination ng prosecution ay bahagi ng ebidensya sa Article II ng impeachment case na tumatalakay sa alegasyon ng hindi maipaliwanag na yaman at mga ari-arian ni VP Sara.
