Nagsanib-pwersa ang Globe at ang Bankers Association of the Philippines (BAP) upang lalo pang mapalakas ang mga hakbang sa cybersecurity ng mga bangko.
Sa pamamagitan nito, mananatiling ligtas ang publiko mula sa mga lumalaganap na mapaglinlang na mga aktibidad gamit ang internet, SMS, at voice calls.
Ang pagpirma sa Memorandum of Understanding (MOU) ay pinangunahan nina Globe Group CEO/President Ernest Cu at BAP President Antonio Moncupa, Jr.
Dumalo rin sa event sina Globe Chief Information Security Officer Anton Bonifacio, Globe Chief Privacy Officer Irish Salandanan-Almeida, BAP Cybersecurity Committee Chairman Eugene Acevedo, at BAP Managing Director Benjamin Castillo.
Ang BAP ay mayroong 45 na miyembro sa kasalukuyan, kabilang na ang 21 lokal na mga bangko at 24 na mga sangay mula sa ibang bansa.
Pangako ng grupo, hihikayatin nito ang mga miyembrong bangko na tulungan ang Globe na masolusyunan ang tumataas na bilang at lalo pang nagiging komplikado na mga krimeng pampinansiyal.
Bunga ng digitalization, dumarami ang mga kaso ng identity theft, phishing, spam SMS, at iba pang gawaing panloloko. Ang mga krimeng ito ay lubhang nakaaapekto sa mga mamamayan at sa iba’t-ibang industriya gaya ng pinansiyal, telekomunikasyon at e-commerce.
“Umaasa kami na ang MOU na ito ay magbibigay-daan para makapagbahagi ng data at intelligence ang Globe at mga BAP member-banks para mas mapaigting ang pagtuklas at pag-iwas sa mga gawaing panloloko. Mababawasan nito ang mga limitasyon sa pakikipagtulungan ng dalawang grupo habang nananatiling sumusunod sa mga alituntunin ng Data Privacy Act of the Philippines,” pahayag ni Cu.
“Nalulugod kami sa kolaborasyon kasama ang Globe. Mas mapapahusay nito ang pagsisikap ng industriya na mapigilan ang cybercrime. Makakatulong ang MOU sa paglalagay ng mga karagdagang hakbang para mahuli ang mga cybercriminals at mapanagot sila sa kanilang mga aksyon,” wika naman kay Moncupa.
Napag-alaman na bago pa man ang MOU, nakikipagtulungan na ang Globe sa mga malalaking bangko at online retailers sa bansa. Mayroong sari-sariling 24/7 na komunikasyon ang Globe sa mga ito para mapadali ang pagsumbong, pag-imbestiga, at pagharang sa mga malisyosong aktibidad gamit ang SMS.
Sinasabing mula Enero hanggang Agosto ngayong taon, naharang ng anti-spam at security protocols ng Globe ang nasa 36.7-milyong bank-related spam at scam messages.
Una rito, sinimulan ng telco ang pagpapalakas ng kakayahan nito sa cybersecurity noong 2014 para maiwasan ang mga pag-atake at banta sa imprastraktura nito at maprotektahan ang mga customer.
Maliban dito, walang humpay ang paglaban ng Globe sa mga cyber threats. Hinihikayat nito ang publiko na makiisa sa pamamagitan ng pagsumbong ng mga natatanggap na spam at scam messages sa Stop Spam Portal. Mayroon ding mga cyber safety educational materials ang kumpanya na pinalalabas sa pamamagitan ng Digital Thumbprint Program (DTP) at #makeITsafePH campaign.
Para sa karagdagang kaalaman, bisitahin ang website ng nasabing telco.