Nanawagan ng pagkakaisa, pagtutulungan at suporta mula sa publiko ang Malacañang para matagumpay na muling ibangon ang lungsod ng Marawi.
Ayon kay Presidential Spokesman Ernesto Abella, ang reconstruction at rehabilitation ng lungsod aniya ang pinakamalaking hamong kinahaharap ngayon ng pamahalaan matapos ang limang buwang bakbakan sa lugar.
Kasunod nito, sinaluduhan ng palasyo ang militar at pulisya na matapang na humarap sa mga teroristang Maute – ISIS group dahil sa hindi matatawarang tapang at sakripisyong kanilang inilaan para sa bayan.
Ang tagumpay aniya laban sa mga terorista ang siyang nagbibigay hudyat din sa buong mundo sa pakikiisa ng Pilipinas na labanan ang seryosong banta ng terorismo.
Ngayon aniyang tapos na ang digmaan sa Marawi City, sinabi ni Abella na ito na ang tamang pagkakataon para simulan na ang mga hakbang para sa muling pagbangon ng mga taga-Marawi.
