Umapela si Davao City Mayor Sara Duterte – Carpio na tanggalin ang kaniyang pangalan sa mga poll o survey hinggil sa nalalapit na 2022 presidential elections.
Ito’y makaraang manguna ang alkalde sa Pulse Asia survey ng mga posibleng maging kandidato sa pagkapangulo kapalit ng kaniyang amang si Pangulong Rodrigo Duterte.
Ayon kay Mayor Sara, hindi muna niya iniisip sa ngayon ang darating na halalan lalo’t hindi pa nakababangon ang lungsod mula sa epekto ng COVID-19 pandemic.
Sa panig naman ni Vice President Leni Robredo na kasama rin sa survey, hindi ito ang panahon upang pag-usapan ang pulitika sa halip aniya ay dapat pagtuunan ng pansin ang mga malalaking problemang kinahaharap ngayon ng bansa.
