Tiniyak ng pamunuan ng mga mall sa kalakhang Maynila na handa nilang sundin ang napagkasunduang desisyon ng Metro Manila Council (MMC) kaugnay sa pagbabawal ng mga menor de edad sa mall.
Ayon kay SM Mall Senior Vice President Bien Mateo, ipagbabawal ang mga menor de edad sa lahat ng kanilang mall sa bansa bilang pagsunod sa naging desisyon ng MMC.
Gayundin ang pagtitiyak ni Ayala Malls President Jennylle Tupaz sa pagsunod nila sa direktiba ng mga otoridad at patuloy na pagpapatupad ng health at safety protocols upang mapangalagaan kalusugan ng publiko.
Nagpahayag rin ang Robinsons Malls ng kanilang pakikiisa sa direktiba na pagbawalan ang mga menor de edad na papasukin sa loob ng mall.
Magugunitang nagkasundo ang mga Alkalde ng Metro Manila na huwag pa ring payagang lumabas ng bahay at magtungo sa mall ang mga bata.