Inanunsiyo ng Department of Transportation (DOTr) na umabot na sa 30.55% completion rate ang Metro Manila Subway Project ng pamahalaan.
Ayon kay DOTr Undersecretary for Railways Timothy John Batan, ang naturang proyekto ay pinondohan ng P488.48-B kung saan nagpabilis sa proseso ang pagkuha ng 197,000 square meters ng lupa at 585 na istruktura mula sa 324 property owners maging ang patuloy na paggawa ng pre-cast concrete tunnel rings sa 7.5-hectare fabrication yard sa Norzagaray, Bulacan.
Sakop ng inilaang pondo ang P27-B kontrata para sa 240 subway train cars patungo sa Sumitomo Corp. at Japan Transport Engineering Co. (J-TREC) joint venture; P66-B kontrata para sa mga Electromechanical system ng Subway sa Mitsubishi at 25 tunnel boring machine ng subway.
Ang naturang Subway ay magbibigay ng mass transit sa Metro Manila na may 17 istasyon kabilang na dito ang East Valenzuela, Quirino Highway, Tandang Sora, North Avenue, Quezon Avenue, East Avenue, Anonas, Camp Aguinaldo, Ortigas, Shaw, Kalayaan, BGC, Lawton Station, Senate, FTI , Bicutan, at NAIA Terminal 3.
Sakaling magsimula na ang operasyon ng subway ay mas mapapabilis nito ang biyahe ng mga commuters papasok sa kanilang trabaho at pauwi sa kanilang mga tirahan. —sa panulat ni Angelica Doctolero