Nakikita ng maraming Gen Z na Pilipino na sila ang magiging “breadwinner” ng kanilang mga pamilya.
Ayon sa kauna-unahang edisyon ng Filipino Perspectives Digest ng W-R Numero, financial stability at pagsuporta sa kanilang mga mahal sa buhay ang pangunahing prayoridad ng kanilang mga respondents edad disi-ocho hanggang bente-singko.
Kabilang anila sa mga nais maabot ng mga respondents ay ang pagkakaroon ng master’s degree, pagbiyahe, at pangingibang-bansa; habang kapansin-pansin din na ang mababang sahod, mga problema sa trabaho, at katiwalian sa pamahalaan ang pangunahing hadlang sa kanilang mga nais maabot sa buhay.
Ang Filipino Perspectives Digest ay produkto ng mga panayam na ginawa ng W-R Numero sa halos limampung kabataang Pilipino na ipinanganak sa pagitan ng 1997 at 2012, o ang mga kabilang sa tinatawag na Gen Z.
