Posibleng malugi ng mahigit anim na bilyong piso ang pamahalaan dahil sa umiiral na rice importation ban.
Ito’y ayon sa Bureau of Customs matapos umabot sa tatlong bilyong piso ang nawalang kita sa bansa mula Setyembre hanggang Oktubre dahil sa pagbawas ng pag-aangkat ng bigas.
Sinabi ni Customs Commissioner Ariel Nepomuceno na patuloy pa rin nilang hinahanap ang iba pang pagkukunan ng koleksyon upang mapunan ang kakulangan.
Target ng BOC na makakolekta ng 958-point-7 billion pesos ngayong taon, ngunit posible aniyang umabot lamang ito sa 950 billion pesos.
Umaasa naman ang Aduana na mababawi ang pagkalugi sa mas mataas na koleksyon mula sa oil at agricultural imports.
Batay sa datos ng Bureau of Treasury, umabot sa 701-point-7 billion pesos ang koleksyon mula Enero hanggang Setyembre, na bahagyang mas mataas kaysa nakaraang taon; ngunit 1-point-4 percent naman itong mababa sa kanilang target.
