Handang harapin ni dating House Speaker at Leyte Rep. Martin Romualdez ang kasong isasampa laban sa kanya sa Ombudsman kaugnay ng maanomalyang flood control projects.
Magugunitang inirekomenda ng Department of Public Works and Highways at Independent Commission for Infrastructure sa Office of the Ombudsman na sampahan ng kasong plunder, graft, at indirect bribery si Romualdez.
Ayon kay Romualdez, gaya ng mga nauna niyang pahayag, handa siyang makipag-tulungan sa imbestigasyon ng I-C-I, patunay anya ang kanyang pagharap noong siya ay ipinatawag sa pagdinig ng komisyon.
Aminado ang kampo ni Romualdez na nabigla sila sa isinampang kaso kung saan mismong si Pangulong Ferdinand Marcos Jr. ang naghayag sa kanyang social media account.
Matatandaang sa nakaraang presscon ng Pangulo, wala pang direktang nag-uugnay sa kanyang pinsan sa flood control scam at maging sa budget insertions.
Umaasa naman si Romualdez na magiging patas ang imbestigasyon at handa siyang makipag-tulungan para lumabas ang katotohanan.—sa panulat ni Jordan Gutierrez—ulat mula kay Geli Mendez (Patrol 30)
