Ipinanawagan ng election watchdog na National Citizens’ Movement for Free Elections (Namfrel) ang mano-manong bilangan ng boto sa mga voting precincts sa darating na May 2022 elections.
Ayon kay Namfrel president Gus Lagman, sa automated na bilangan, matapos i-shade ang balota ay wala nang nakakakita kung paano binibilang ang boto.
Bagama’t maaaring umabot ng ilang araw ang mano-manong botohan, makakatulong naman ito para tiyakin ang transparency sa darating na eleksyon.
Sa ganitong paraan din aniya, mababawasan ang agam-agam ng botante sa magiging resulta ng halalan.
Maliban dito, iminungkahi din ni Lagman na dapat isagawa ang final testing at sealing ng vote counting machines, tatlong araw bago ang eleksyon para mabawasan ang tiyansa na mapakialamanan ito. —sa panulat ni Abie Aliño-Angeles
