Naglabas ng bagong panuntunan ang Commission on Audit na nagtatakda ng mandatory geotagging para sa lahat ng government infrastructure projects upang tuluyang masugpo ang mga ghost projects at mapigilan ang falsified billing at maling paggamit ng pondo ng bayan.
Ayon sa COA, minamadali na nito ang pinal na pag-apruba sa panuntunang pinamagatang “Mandatory geotagging for all infrastructure projects of national government agencies, LGUs, and GOCCs.”
Saklaw nito ang pagsusumite ng GPS-based geotagged photos sa bawat yugto ng proyekto hanggang matapos ang warranty period.
Sinabi ni COA chairperson Gamaliel Cordoba na tugon ito sa paulit-ulit na panawagan ng publiko para sa mas mahigpit na transparency.
Hindi maaaring markahang completed ang isang proyekto, at hindi rin dapat maglabas ng bayad, hangga’t walang isinusumiteng kumpletong geotagged photos na may eksaktong GPS coordinates, petsa, at oras.
Daraan din ito sa beripikasyon ng COA audit teams bago aprubahan.
