Nakiki-isa ang Malakanyang para sa isang mapayapa at makabuluhang pag-gunita ng All Souls’ Day, ngayong araw, November 2.
Sa ipinalabas na mensahe ni Presidential Spokesperson Salvador Panelo, kanyang sinabi na isang magandang paalaala ang araw ng mga kaluluwa sa lahat ng mga Pilipino, anuman ang estado, na bigyang kahulugan ang bawat oras ng buhay.
Ipinakikita rin aniya ng araw na ito kung gaano kabilis ang buhay at gaano ka-ikli ang oras.
Dahil dito, hinihiling ng kalihim na nawa’y magsilbi puwersa ito sa lahat para gumawa ng mabuti, may habag at pagpapatawad sa kapwa gayundin para makamit ang inaasam na pagbabago ng lipunan.
Sinabi pa ni Panelo, magandang pagkakataon din ang All Souls Day para makapag-alay ng dasal sa lahat ng mga yumaong mahal sa buhay at patuloy na humingi sa kanila ng proteksyon at gabay.