Mahigit isang libo katao ang naaresto ng Philippine National Police o PNP sa iba’t ibang operasyon habang ipinagdiriwang ang Undas sa bansa.
Ayon sa PNP, mula Oktubre a-trenta’y uno hanggang kahapon, nakapagsagawa ang pambansang pulisya ng mahigit isang libo’t tatlong daan na operasyon sa buong bansa na nagresulta sa pagkakaaresto ng 1,163 individual.
Kabilang na rito ang 517 na wanted sa iba’t ibang kriminal na kaso.
Isinagawa rin ang mga operasyon kontra droga, illegal gambling, at kontra loose firearms sa buong long weekend.
Binigyang-diin naman ni PNP acting chief Lieutenant General Jose Melencio Nartatez Jr. na nananatiling nakatuon sa direktiba ni Pangulong Ferdinand Marcos Jr. ang ahensya na protektahan ang bawat Pilipino sa panahon ng Undas at patuloy na tinitiyak ang isang ligtas na kapaligiran para sa lahat.
Dahil dito, nakasamsam rin ang mga otoridad ng 478 bladed weapons, animnapu’t limang bote ng alak, limampu’t dalawang pack ng barahang pangsugal, at iba pang bagay na umabot sa 11,653.
Dagdag pa ng PNP, agad din silang tumugon sa mga insidente ng pang-a-atake, aksidente sa daan, sunog, at illegal possession of firearms upang masiguro ang kaligtasan ng publiko.
