Ipinagmalaki ng PDEA o Philippine Drug Enforcement Agency na aabot sa 3,677 sa kabuuang 42,036 na barangay sa bansa ang nalinis na sa iligal na droga.
Ayon kay PDEA Director General Isidro Lapeña, ang mga barangay na ito ay binigyan ng “drug-cleared status”, batay sa sertipikasyon ng mga miyembro ng Oversight Committee on Barangay Drug-Clearing Program.
Bago ideklarang drug free ang isang barangay, kinakailangan na mag-convene ng komite at suriin ang isang barangay kung talagang wala nang kumakalat, nagne-negosyo at ginagawang iligal na droga sa kanilang lugar.
Batay sa pagtaya ng PDEA, 47.83% ng kabuuang barangay sa buong bansa ang drug-affected at sa bilang na ito ay nasa 68.5% ang maituturing na “slightly affected”, 30.4% ang “moderately affected”, habang ang nalalabing 1% ay “seriously affected.”
Pabayang barangay officials bibigyan ng mas mabigat na sanction
Nakatakdang patawan ng mas mabigat na parusa ng sa mga barangay official na hindi mapapanatili ang kaayusan sa kanilang mga nasasakupan.
Kasunod ito ng pagpasa sa mga barangay ng obligasyong panatilihin ang mga lugar na dati nang isinailalim sa clearing operations ng MMDA o Metro Manila Development Authority.
Ayon kay MMDA Chairman Danny Lim, pi-pirma ang MMDA at DILG o Department of Interior and Local Government sa isang memorandum na nagtatalaga ng mas mabigat na sanction sa mga pabayang barangay official.
Kabilang sa mga parusang maaring kaharapin ng naturang mga barangay opisyal ay ang agarang suspensyon sa kaso.
Samantala, labing isang (11) opisyal na ng barangay ang sinampahan ng kaso ng MMDA sa Office of the Ombudsman dahil sa kapabayaan sa trabaho.
By Meann Tanbio / Rianne Briones
