Hinamon ni Pangulong Rodrigo Duterte si Magdalo Partylist Rep. Gary Alejano na pangunahan ang pagpunta at pag-angkin sa Spratly Islands para makita ang hinahanap nito.
Ito ang inihayag ni Pangulong Duterte kasunod ng plano ni Alejano na mag-file ng supplemental complaint sa inihaing impeachment complaint laban sa kanya kaugnay sa issue ng Benham Rise.
Ayon kay Duterte, kung gusto ni Alejano na lumaban sa China ay pagbibigyan niya ito para makita kung gaano katapang ang pagiging Magdalo nito.
Hanggang ingay lamang anya ang kongresista tulad ng mga kasamahan sa Magdalo dahil bahag naman ang buntot nito tulad ng ipinakita nilang mutiny noong 2003.
Ginulo lamang nina Alejano ang publiko at puro lang yabang dahil wala namang ginawang maganda para sa mga Pilipino.
Nakita na aniya ng mga Pilipino ang pagtatapang-pangan ng grupo ni Alejano laban sa gobyerno pero nabigo kaya’t sila ay malaking kahihiyan sa lipunan.
By: Drew Nacino / Aileen Taliping
