Tiniyak ng isang mambabatas na handa ang mababang kapulungan na magbigay ng dagdag na pondo para mapabilis ang ginagawang hakbang ng pamahalaan kontra coronavirus disease 2019 (COVID-19) pandemic.
Ayon kay ways and means committee chair, Congressman Joey Salceda, nagpapatuloy ang kanilang pag-aaral sa pondong gugugulin para sa testing, tracing at pagmo-monitor sa patuloy na paglobo ng bilang ng COVID-19 cases sa bansa.
Dagdag pa ni Salceda, bukas aniya ang kongreso sa anumang proposals o suhestyon mula sa ehekutibo para mapataas ang daily testing capacity ng bansa.
Bukod pa rito, inirekomenda rin ni Salceda kay testing, tracing at treatment chief secretary Vince Dizon, na agarang magbukas ng mass testing sites sa ilang rehiyon tulad ng NCR, Calabarzon, Central Luzon, Metro Cebu at Metro Davao.
Kasunod nito ayon pa kay Congressman Joey Salceda, ang susi para panatilihin ang kumpyansa at tiwala ng mga negosyo at mga konsumer nito ay ang paghahanda ng pamahalaan sa hospital at treatment centers, oras na tumaas pa ang kaso ng nakamamatay na virus.