Sinibak ni Transportation Secretary Arthur Tugade ang isang opisyal ng Land Transportation Office o LTO sa Tarlac dahil sa umano’y pagkakasangkot sa iligal na droga.
Ayon kay Tugade, walang puwang sa kagawaran ang aniya’y isang anay na maituturing maging sa lipunan.
Iginiit pa ni Tugade, hindi niya kinukunsinte ang kanyang mga tauhan na nasasangkot sa katiwalian, lalo’t higit sa kalakaran ng iligal na droga.
Magugunitang, Mayo 8 nang maaresto ng pinagsanib na puwersa ng Philippine National Police (PNP) at Philippine Drug Enforcement Agency o PDEA si LTO Tarlac Officer in Charge Rodel Yambao sa isang anti-drug operations.
Nasamsam sa tahanan ni Yambao ang siyam na sachet ng hinihinalang shabu, isang hand grenade at mga bala.
Samantala, inatasan naman ni Tugade si LTO Chief Edgar Galvante na magsagawa pa ng mas malalim na imbestigasyon para matukoy kung nasangkot din si Yambao sa korapsyon.
—-