Pormal nang nanungkulan ngayong araw si M/Gen. Andres Centino bilang commanding general ng Philippine Army.
Pinangunahan ni Defense Sec. Delfin Lorenzana at AFP chief of staff gen. Cirilito Sobejana ang change of command ceremony sa Philippine Army headquarters sa Fort Bonifacio, Taguig City.
Pinalitan ni Centino si Lt/Gen. Jose Faustino na itinalaga namang special assistant to the chief of staff on peace and development ng AFP.
Bago hirangin bilang bagong Army Chief, una munang nagsilbi si Centino bilang commander ng 4th infantry division mula noong isang taon.
Bago iyan, naging commander muna si Centino ng 26th infantry battalion noong 2008; secretary army general staff noong 2013; commander ng 401st infantry brigade noong 2017 at deputy chief of staff for operations o J3 ng AFP noong 2019.
Sina Faustino at Centino ay “mistah” o kaklase sa Philippine Military Academy (PMA) Maringal Class of 1988.
Sa kaniyang talumpati, kinilala ni Lorenzana ang mga nagawa ni Faustino sa 3 buwang termino nito habang umaasa naman siyang itutuloy ni Centino ang pinaigting na kampaniya kontra terrorismo at insurgency sa bansa. — ulat mula kay Jaymark Dagala (Patrol 9)
