Binawi na ng Professional Regulation Commission ang lisensya ng dating Bulacan district engineer ng Department of Public Works and Highways na si Henry Alcantara.
Ayon sa PRC, ito’y dahil sa gross unprofessional at unethical conduct ng dating opisyal ng DPWH kaugnay sa kontrobersiya ng flood control projects.
Napatunayan anilang dapat administratibong managot si Alcantara sa paglabag kaugnay ng pagpapalabas ng pondo para sa mga sinasabing ghost projects noong nagta-trabaho pa siya sa DPWH.
Iginiit ng PRC na alinsunod din ang desisyon sa special audit report and decision ng DPWH, na naglatag ng ebidensiyang sinadyang aprubahan ni Alcantara ang bayad para sa mga pekeng proyekto na isang malinaw na paglabag sa Code of Ethics for Civil Engineer at betrayal of public trust.
Nilinaw ng PRC na maaari pang maghain ng motion for reconsideration si Alcantara sa loob ng labinlimang araw, at kung maibasura, may option ang dating DPWH official na umapela sa Commission Proper sa itinakdang panahon.
