Naglabas ng cease-and-desist order ang Department of Environment and Natural Resources laban sa Prime Integrated Waste Solutions, Inc., operator ng Binaliw sanitary landfill, kasunod ng naganap na landslide.
Batay sa isinagawang site inspection ng DENR–Environmental Management Bureau Region 7, inatasan ang PIWSI na itigil ang lahat ng operasyon ng sanitary landfill, kabilang ang pagtanggap ng basura.
Pinapayagan lamang ang rescue, retrieval, at cleanup operations na isasagawa sa koordinasyon ng mga kaukulang ahensiya.
Ayon sa DENR, inilabas ang CDO upang bigyan ng kapangyarihan ang EMB regional director na suspindihin ang operasyon ng pasilidad kung may banta ng seryoso o irreversible harm sa kapaligiran at kaligtasan ng publiko.
Kasabay nito, pinatawag ang nasabing kumpanya sa isang technical conference upang magpaliwanag hinggil sa insidente at pinagsusumite ng compliance commitment.
Patuloy rin ang pakikipag-ugnayan ng DENR sa mga lokal na pamahalaan alinsunod sa Republic Act 9003 o Ecological Solid Waste Management Act at sa Local Government Code, upang palakasin ang pangangasiwa sa mga pasilidad ng basura at maiwasan ang kahalintulad na insidente sa hinaharap.
