Iginiit ng Malakanyang na hindi maaaring ipataw o i-apply ang sub judice rule maliban na lamang kung mismong ang International Criminal Court ang magsabi na may nangyaring paglabag.
Ginawa ni Communications Usec. Claire Castro ang pahayag sa gitna ng kaliwa’t kanang diskurso hinggil sa kaso ni dating Pangulong Rodrigo Duterte sa ICC, kung saan lumitaw ang usapin kung may paglabag sa sub judice rule dahil sa mga pahayag ng iba’t ibang abugado, legal experts, at maging ng kampo ng dating presidente.
Subalit, ayon kay Castro, ang kapangyarihan sa pagpapatupad nito ay nasa saklaw lamang ng ICC kung saan nakabinbin ang kaso.
ICC lamang aniya ang puwedeng magreklamo at magbigay ng order na huwag pag-usapan ang nasabing kaso.
Ang sub judice rule ay isang law principle na nagbabawal sa pagko-komento o pahayag na maaaring makaapekto sa isang kasong nakabinbin sa korte. —sa panulat ni Laica Cuevas mula kay Gilbert {Perdez (Patrol 13)
