Nangunguna ang laban kontra korapsyon sa mga isyung nais marinig ng mga Pilipino sa nalalapit na State of the Nation Address (SONA) ni Pangulong Ferdinand Marcos Jr.
Batay sa pinakahuling survey ng Pulse Asia, halos 30% ang nagsabing inaasahan nila na talakayin ng Pangulo ang mga hakbang ng pamahalaan laban sa korapsyon.
Kabilang dito ang imbestigasyon at pananagutan sa mga sangkot sa umano’y mga iregularidad sa mga flood control project.
Sumunod naman sa mga pangunahing isyu ang pagpapababa ng presyo ng mga pangunahing bilihin.
Lumabas din sa survey na ang isyu ng korapsyon ang pinakamataas na prayoridad sa Metro Manila, natitirang bahagi ng Luzon, Mindanao, at sa mga kabilang sa Class ABC at Class D.
Samantala, sa Visayas, mas marami ang nagnanais na marinig ang mga plano ng pamahalaan para sa mas abot-kayang presyo ng mga pangunahing bilihin, na sinundan ng usapin sa korapsyon.—sa panulat ni Daniela De Guzman
