Dedesisyunan na ng Department of Justice o DOJ ang unang reklamo ng tax evasion na inihain ng Bureau of Internal Revenue (BIR) laban sa Mighty Corporation.
Ito’y matapos na makapagsumite ang Mighty Corporation at ang mga opisyal nito ng rejoinder o tugon sa isinumiteng reply ng BIR.
Personal na dumalo sa pagdinig ang may-ari ng Mighty Corporation na si Alexander Wongchuking na siya ring tumatayong Vice President for External Affairs at Assistant Corporate Secretary ng nasabing kumpanya.
Ang nasabing reklamo laban sa Mighty Corporation ay may kaugnayan sa 9.56 billion pesos na hindi nabayarang buwis ng kumpanya dahil sa natuklasang pagamit ng pekeng tax stamp sa mga nasamsam na mga paketeng sigarilyo nito sa kanilang warehouse sa San Isidro, Pampanga
Samantala, itinakda ni Senior Assistant State Prosecutor Sebastian Caponong ang unang araw ng pagdinig sa ikalawang tax evasion case laban sa Mighty Corporation sa June 8.
Sa kabuuan, aabot naman sa mahigit 37 bilyong piso ang hinahabol na buwis ng pamahalaan sa Mighty Corporation.
By Meann Tanbio | With Report from Bert Mozo