Walang magiging epekto sa operasyon ng Department Of Justice (DOJ) ang paghahain ng aplikasyon ng isa sa mga opisyal nito para maging hukom ng Metropolitan Trial Court sa NCR.
Ito ang tiniyak ni Justice Secretary Menardo Guevarra matapos niyang kumpirmahin ang pag-aapply ni Justice Deputy Spokesperson at Assistant Secretary Neal Vincent Bainto para maging hukom.
Ayon kay Guevarra na tumatayo rin bilang Ex-Officio member ng judicial and bar council, batid niyang matagal nang ikinukunsidera ni Bainto ang sumabak sa judiciary.
Sinabi ni Guevarra, mahaba-haba pa ang proseso sa aplikasyon ni Bainto sa pagkahukom kaya natitiyak siyang hindi ito makakaapekto sa trabaho ng DOJ.
Sakaling mapili at maitalaga bilang hukom, si Bainto na ang ikalawang opisyal na aalis sa DOJ kasunod ni Dating Undersecretary Markk Perete na nagbitiw sa puwesto noong nakaraang linggo bunsod ng personal na dahilan.
