Natagpuan ang isang magsasaka sa tiyan ng isang python matapos siyang lunukin ng higanteng ahas sa Indonesia.
Kinilalang si Akbar, 25, ang nakita sa loob ng tiyan ng may 7 metrong habang python.
Noon pang Linggo hinahanap ng kanyang kamag-anak si Akbar na una nang umalis upang mag-ani ng mga pananim.
Ayon sa isang opisyal, nagkaroon na sila ng suspetsa na nilunok ng ahas si Akbar dahil nakita nila ang mga inani niyang mga palm fruit at gamit pang-ani sa mismong lugar kung nasaan ang python.
Dagdag pa ng mga residente, nakitang umaaligid-aligid ang naturang ahas sa nayon ng Salubiro sa silangang isla ng Sulawesi noong Lunes.
Samantala, karaniwang natatagpuan sa Indonesia at Pilipinas ang ganitong uri ng python na humahaba hanggang 20 talampakan.
Kilala rin ito na kumakain ng mga maliliit na hayop at bihira ang insidenteng pagkain nito ng tao.
By Race Perez
