Ipinagkibit-balikat lang ni Chief Presidential Legal Counsel Atty. Salvador Panelo ang inaasahang panibagong pasabog ngayong araw ni Senator Antonio Trillanes IV laban kay Pangulong Rodrigo Duterte.
Sa panayam ng “Balitang Todong Lakas”, sinabi ni Panelo na lahat ng sinasabi ni Trillanes ay pawang kasinungalingan partikular sa isyu ng umano’y Davao Death Squad (DDS).
“Yang sa DDS naman ay lumang istorya yan, tsaka huwag nating kalimutan na sa senate hearing nabuking sila na sinasabi ni Lascañas na 1988 pa raw yung DDS yun pala 1989 na siya pumasok sa pagpupulis, tinanong siya so nag-aassume ka lang? sinabi niya opo. Ayun.” Ani Panelo
Sinagot din ni Panelo ang mga lumalabas na ulat na sa darating na Mayo isasakatuparan ang destabilization plot na pamumunuan ni Trillanes para tuluyang mapatalsik sa puwesto ang Pangulo.
“Yang impormasyon na yan ay siya mismo ang nagsabi niyan sa isang interview, sa kanya mismo nanggaling yan, siya ang nagpapakalat ng tsismis.” Dagdag nito
Gayunman inihayag ni Panelo na sa ngayon ay pinag-aaralan na ng Solicitor General at ng Department of Justice ang posibleng kaso na isasampa laban sa senador.
“Ang ginagawa niya kasi hinihikayat niya ang mga tao na magalit kay Presidente Duterte na wala namang batayan. Repeatedly ang sinasabi niya, mamamatay tao, corrupt ang ating Presidente, yan ang mga ginagawa niya. Ever since ang mga banat niya pumuputok lang naman sa mukha niya, talagang naninira siya.” Dagdag ni Panelo
Una nang sinabi ni Trillanes na nakatakda niyang ipresenta ang pito (7) pang testigo para isiwalat ang mga nalalaman kaugnay sa operasyon ng DDS sa bansa at ang pagkakasangkot dito ng noo’y Mayor ng Davao na si Pangulong Rodrigo Duterte, lima sa mga ito aniya ay pawang miyembro ng umano’y vigilante group.
Benham Rise
Samantala, walang pondo ang gobyerno para mabantayan at malagyan ng mga marka ang Benham Rise bilang patunay na pag-aari ito ng Pilipinas.
Ayon ito kay Chief Presidential Legal Counsel Salvador Panelo kayat hindi na rin dapat pansinin ang namataang survey ship ng China sa Benham Rise.
Sinabi sa DWIZ ni Panelo na dapat makipagkaibigan ang gobyerno sa kahit anong bansa na maaaring makatulong sa Pilipinas.
“Ang narinig ko sa Presidente sa press con ay sinabi niya ay alam ko yun yung pagpunta doon ng China, kumbaga eh nagpaalam, eh passing through lang naman, wala namang ginawa doon, ang problema pera ang kailangan nila, hindi naman tayo sinsasalakay at hindi natin kaya ang giyera ngayon, kaya nga ang naging policy ng Pangulo ay makipag-kaibigan tayo sa lahat, kung anong puwedeng maitulong ng friendly nations eh tanggapin natin.” Pahayag ni Panelo
By Aiza Rendon | Judith Larino | Balitang Todong Lakas (Interview)