Kumpiyansa ang Philippine National Police (PNP) na makapag-aadjust din sa lalong madaling panahon ang publiko ngayong pumapasok na ang bansa sa new normal.
Ito’y makaraang mapuna ang pagdagsa ng mga tao sa iba’t ibang pampublikong lugar ngayong isinailalim na ang karamihan sa modified enhanced community quarantine (MECQ) at general community quarantine (GCQ).
Ayon kay PNP Spokesman P/BGen. Bernard Banac, batid nila ang pananabik ng publiko na makalabas sa kanilang mga tahanan subalit pinangangambahan nila ay pagkakaroon ng 2nd wave ng coronavirus disease 2019 (COVID-19) infection.
Gayunman, dahil pumapasok na ang bansa sa new normal, kailangan nang masanay ng publiko at umaasa silang matututunan din ng lahat ang mag-adjust.