Tiniyak ng Independent Commission for Infrastructure (ICI) na magpapatuloy ang kanilang imbestigasyon at pagsusumite ng mga rekomendasyon sa Office of the Ombudsman laban sa mga posibleng sangkot sa mga maanomalyang flood control project, kahit saan pa man naroroon ang mga ito.
Ito ang kinumpirma ni ICI Executive Director Brian Keith Hosaka matapos kumpirmahin ng Bureau of Immigration na umalis ng bansa patungong Estados Unidos nitong Martes ng hapon si dating Department of Public Works and Highways (DPWH) Secretary Manuel Bonoan.
Nilinaw ni Atty. Hosaka na wala umanong kapangyarihan ang ICI na magpalabas ng hold departure order, at maaari lamang itong magrekomenda sa Department of Justice (DOJ) na isama ang isang indibidwal sa immigration lookout bulletin.
Una nang inirekomenda ng ICI sa Ombudsman ang paghahain ng mga administratibong kaso laban kay dating Secretary Bonoan at ilang dating opisyal ng DPWH kaugnay ng umano’y “ghost” flood control projects sa Bulacan.
